Wetin Dey Happen to Aba Boys Wey Dey Form Big Men for Instagram?

I just dey think say, na only Aba get this kain thing. You see young boy wey dey post private jet, dey call himself CEO, yet e dey owe his tailor for Ariaria. The same guy wey dey flex for social media, na him dey borrow money to buy fuel for generator. No be so?

I no dey talk say make we suffer in silence. But na the way we dey fake am wey dey worry me. The real hustle no dey need filter. The guy wey dey sell phone accessories for Shoprite, na him dey buy land for village. The babe wey dey hawk puff puff for morning, na she dey sponsor her younger sister for school. That one na real CEO. But na the ones wey dey rent car to take picture for airport wey dey make noise. Abeg, wetin una dey prove?

Na so we dey form, but na so the economy dey catch us. E no better for anybody. But make we at least dey real with ourselves. The day we start to value the small correct hustle pass the big fake life, that day naija go change. Wetin dey better: to dey flex wey nobody believe, or to dey grind wey everybody go respect? Make una tell me. 💰