ECOWAS chair wey dey talk, dem no gree am o

So yesterday, Burkina Faso, Mali and Niger don officially condemn President Tinubu for wetin e tok about regional security. Dem say e dey disrespect dem and dia sovereignty. Na Ibrahim Traore and di other military leaders dey vex say Tinubu dey carry di matter like im own personal fight.

E funny say na im be ECOWAS chairman, but di three countries don already leave ECOWAS since last year. So wetin e gain by opening im mouth? Dem go just use am to whip up anti-Nigeria sentiment for dia citizens. Meanwhile, we for here dey manage fuel price wey don pass 900 naira per litre for some filling stations for Lagos Island.

Di real question be say, when una dey talk about security for West Africa, wetin una don do about di insecurity for Nigeria? We dey lose sleep over bandits for Katsina and Boko Haram for Maiduguri, but una dey form big man for international stage. Abeg, make una first fix our own house before una dey talk for oda people.