Adeleke don open 78,000 gap for Osun, APC dey shake

Governor Ademola Adeleke don carry commanding lead over Bola Oyebamiji for Osun State governorship election as INEC don announce results from 20 out of 30 local government areas. The figures wey don come out show Adeleke with 365,922 votes while Oyebamiji get 287,695, meaning the incumbent don open gap of 78,227 votes. And this one na before the remaining 10 LGAs wey still dey come.

Wetin sweet pass for Adeleke supporters na im home base Ede North and Ede South. For Ede North alone he collect 35,427 votes against Oyebamiji's 10,283, that na 25,000 margin wey heavy. Osogbo also follow am with 36,480 to 30,474. The man don win Ife East, Iwo, Ife North, Boluwaduro, Ilesha West, Ifedayo, Ife Central, Orolu, Oriade, Odo Otin and Ifelodun. Oyebamiji no too dull sef, he win Ilesha East, Boripe, Irepodun, Obokun and Atakumosa West, but e no enough to cancel the gap wey Adeleke don build.

With 10 LGAs wey remain, anything fit still happen but Adeleke don reach half way and e get comfortable cushion. Najeem Salaam of ADC dey third with just 9,124 votes, so na two-horse race really. The question wey dey my mind be say, if Adeleke finish this strong, wetin APC go use talk for court this time? Because we all know say election no end for collation centre for this country.